Kaho to laut jate hain

Abhi to baat lamhon tak hai, saalon tak nahi ayi

Abhi muskaano ki naubat bhi naalon tak nahi ayi

Abhi to koi majboori khayalon tak nahi ayi

Abhi to gard pairon tak hai, Baalon tak nahi ayi

Kaho toh laut jatay hain...

Chalo ek faisla karne shajar ki or jate hain

Abhi kajal ki dori surkh gaalon tak nahi ayi

Zubaan daanton talak hai zehar pyaalon tak naheen ayi

Abhi toh mushk-e-kustori ghazalon tak nahin ayi

Abhi rudaad-e-be-unwaan humare darmiyaan hai, duniya waalon tak nahin aai

Kaho toh laut jate hain......

Abhi nazdeek hain ghar aur manzil door hai apni

Mabaada naar ho jaye yeh hasti noor hai apni

Kaho toh laut jate hain.....

Yeh rasta pyar ka rasta, Rasan ka daar ka rasta, bohat dushwaar hai jaana

ki is raste ka har zarra bhi ik kohsaar hai jaana.

Kaho toh laut jaatay hain.....

Meray baare na kuch socho

Mujhe taye karna aata hai rasan ka daar ka rasta

Yeh aseebon bhara rasta

Yeh andhi haar ka rasta

Tumhara narm o nazuk haath ho mere haathon mein toh main yeh samjhoon

Ki jaise do jahaan ho meri muthi mein

Tumhara kurb ho toh mushkilain kafoor ho jayein

Yeh andhe aur kale raste pur noor ho jayein.

Tumhare gesuoun ki chaaoun mil jaye to suraj say ulajhna baat hi kiya hai

Utha lo apna saaya toh meri ouqaat hi kiya hai

Meray baare na kuch socho

Tum apni baat batlao

Kaho to chalte rehte hain

Kaho to laut jaate hain.

Kaho to laut jaate hain.